منتجات 1

بسم الله الرحمن الرحيم ..

أهلين و سهلين فيكم .. حبيت اليوم أعرض لكم منتجات أنا جربتها شخصياً و بذكر لكم أيش مميزاتها و أيش محاسنها و سيئتها ..

و هل ممكن أرجع أشتريها و هل أنصح فيها نشوف معكم الحين ,, 

بسم الله 

هذي الصورة جماعية للمنتجات :

1. أول منتج :

مقشر سانت إيفز :  st.ives scrub
عبارة عن مقشر بالمشمش , يقشر الجلد الميت مناسب لجميع أنواع البشرة من ( حساسة , جافة , دهنية ) .
لازم يكون جسمك رطب لمن تحطين هذا المنتج عشان يساعد على التقشير مزبوط .. مكتوب عليه أنه للبشرة كامله 
أي جسم و وجه .. أنا انصح فيه للجسم خصوصاً اليد الأكواع و الركب , لكن أبعديه عن الوجه و الرقبة لأني جربتهم 
و نشف وجهي و تهيج و تركته لكن حطيته على الجسم ..
مكان الشراء : صيدلية النهدي .
2.المنتج الثاني :

غسول وجه :tea tree witch hazel
غسول وجه بالشاهي الأخضر , طبعاً بشرتي صعبة جربت منتجات كثيرة و كلها ما نفعت ف أصرفها للوالدة الله يحفظها و تناسبها سبحان الله :( أما أنا تعبت و مرة رحت مجمع العرب و رحت صيدلية بوتس (قلوب من بيتنا لهم ) وجلست أحوس وشافني الصيدلاني وقلت له عطاني هذا الغسول و جربته و ربي كن ربي مرسله لي غسول فضيع جميل راح أشتري عشرة منه ناسبني مرة و أنصح فيه للبشرتهم مختلطة مثلي أو دهنية مرة مناسب هو يجيك زي الموية لكن لمن تضغطينه يطلع رغوة مرة جميل و تغسلين وجهك بموية دافية و شوفي الأنتعاش كيف ♥
مكان الشراء صيدلية بوتس ♥

3.المنتج الثالث :

مرطب للجسم من جونسون :
مرطب جميل جداً ريحته حلوة و يرطب و أحبببببه مرة هذي رابع مرة أشترية و أحس لازم كل بنوتة يكون عندها تحسين ريحتك أطفال و حلوة , من مكوناته زبدة الشايا و معروف هذي الزبدة قد أيش ترطب و تعطي نعومة ♥
مكان الشراء : الدانوب

4.المنتج الرابع :

سبري جسم من bath & body works 
طبعاً هذا من حبيبة قلبي أختي هدية الله يسعدها ♥♥ سبري جسم بعد الأستحمام جمممممممممممممممممممميل بالعود معه جليتر 
ريحته جميلة و أستخدمه مع الشاور جل أعشق نفسي لمن أحطهم جميلة ريحتهم و تمسك بالجسم و كل من يسلم علي بعدها يقول ريحتك حلوة يعني أشتري من ذا المحل و أنتِ مغمضة و فيه مجموعات كثيرة روعة بس اللي عجبني أكثر هذي المجموعة ..
مكان الشراء : bath & body works

5.المنتج الخامس :

مرطب سيباميد :
مرطب شفايف ينفع بعد ما تسوين سكراب لشفايفك تحطين منه جميل و يرطب أحسه أفضل من لابيلو بكثييير ..


6.المنتج السادس :

سبري من Victoria's Secret 
سبري بالتوت الأسود ريحته حلوة و جميلة بس طبعاً سحبت عليه بعد سبري باث أند بودي وركس .. بس للصراحة حلوة ريحته بس مو ثابت مرة يعني يجلس 3 ساعات ثم تروح الريحة ولا كنك حاطة شيء ..عموماً منتجات فكتوريا سيكرت تبين تثبت لازم تكونين مستخدمة المجموعة كلها عشان تثبت يعني تكونين متروشة بالشاور جل و تتدهنين باللوشن و تبخين الأسبري و العطر 
و طبعاً حنا من النشاط الزايد ما نسوي شيء XD ,, بس أنا أفضل منتجات باث أند بودي وركس على فكتوريا سيكريت ..
مكان الشراء : فافا فوم ركن فكتوريا سيكريت ..
7. المنتجا السابع :

ماسك شعر Macadamia ..

ماسك جميل أخذته من نزية كتجربة صاحب المحل قال خذي المجموعة و المجموعة بذيك الحكاية :/ قمت قلت وش نخسر ناخذ تجربة و ياليتني سمعت كلامه و أخذت المجموعة اللي هي شامبو , سبري , ماسك , زيت .. تندمت مرة روعة و أهم من كذا كله هذي المجموعة طبيعية مافيها كيميائيات أبدن بحثت عنها بالنت لقيت حتى بنات أمريكيات و كنديات مسوين رفيو عنها مرة يمدحونها و ريحتها تجنن بالأفكادو و زيت الأركان طبعاً الريحة تجلس بشعرك ثلاث أيام مرة الريحة جميلة و روعة و أنا راح أشتريها عشان أريح شعري من الكيماويات اللي عدمته :(

مكان الشراء نزية ♥ ♥ 

8.المنتج الثامن :

مقشر من نايتشرز باونتي :
مقشر فضيع يقشر و ينعم و يبيض و يشيل آثار الحبوب روعة هذي ثاني علبة أشتريها مرة جميل أفكر كمان اشتري الطين اللي من نفس الشركة , طبعاً معروفة هذي الشركة من زمان و أنا أشوفها تقشر الركب والأكواع و الجسم كامل و الآحلى أنها تناسب الوجه 
كرة أنصح فيها و بقوة ♥ ♥ 
مكان الشراء: صيدلية النهدي ..

9.المنتج التاسع :

مرهم جل أسمه contractubex
أنا أعاني من آثار الحبوب بعد ما عالجت بشرتي و طبعا كالعادة لقيت هذا الجل قلت خلينا نجربه و نشوف و رحت صيدلية بوتس بيتي الثاني :* و أستفسرت عنه و طلع المرهم المنشود و أخذته و جالسة أجربه الحين لي شهر , صراحة مفعوله بطي شوي بس لاحظت أنه الآثار أختفت 50% و مرة متحمسة أني أكمل الين تختفي و أرتاح .. 
مكان الشراء :صيدلية بوتس .

10.المنتج العاشر :

الصابون المغربي موروكا اويل :
لسى ماجربتها توني شاريتها من نزية بشتري حمام الساونا و أجربة و أعلمكم ..

11. منتجين :

فرشة للوجة مع الغسول من بودي شوب أحس شيء أساسي عند كل وحده تنطف من قلب و تسيل القشور و الحوسة .. مرة جميلة ..
سكراب من باث أند بودي وركس : جميل بالقرفة و القرع ريحته حلوة و تقشيره جميل أمي و خالتي جربوه يقولون يشيل شعر اليد لكن للأمانة أنا مالاحظت شيء :*



و الحمدلله خلصنا من هذي المنتجات و أتمنى أني أكون أفدتكم و أعجبكم الرفيو هذا و الله تعبت فيه بس تعب حلو هذا و الله ♥ ♥ 

أي استفسار أنا بعد فترة بسوي أسك و أحطه هنا بإذن الله ..

شاكرة لكم زيارتكم و أتمنى أكون خفيفة على قلوبكم ,, ♥ ♥ ♥ ♥